Category: Gaurkotasuna zure hurbil

Lanabes bat garatu dugu eskariak hobetzeko eta horniketa eraginkor eta iraunkor bat lortzeko

Operazioen eraginkortasuna etengabe hobetzeko ildoan, hilabete honetan, lanabes berria ezarri dugu, modua ematen diguna gure plataformak modu eraginkorragoan hornitzeko, baita CAPRABO banaketa plataformaren instalazio berriak ere Prat de Llobregaten; hala, hobekuntza dakar bai guretzat eta bai gure hornitzaileentzat.

Aplikazio berri bat da eskari optimoak automatikoki eta maiztasun jakin batez kalkulatzen dituena eta produktuak eskatzeko orduan eskariaren gorabeheretara egokitzen dena. Horretarako, eskaria kalkulatzen du ez bakarrik produktuaren kontsumoa aurreikusiz, baizik eta baita iraupena aintzat hartuz ere. Irizpide horien arabera, palet osoak edo geruza hartzea lehenesten da kutxen formatuaren aldean.

“Aplikazio berriak kostuak arintzen ditu, fabrikatzaileei gutxiago kostatzen baitzaie eskariak prestatzea eta garraiatzea”.

Hornidura katearen eraginkortasuna eta iraunkortasuna produktuaren sorburutik bezeroraino, hori zaintzea giltzarrizkoa da gure sektorearen lehiakortasunean. Tresna berri horrek kostuak arintzen ditu, fabrikatzaileei gutxiago kostatzen baitzaie eskariak prestatzea eta garraiatzea. Eta gure plataformetan ere harrera denbora gutxitzen du. Era berean, gure hornitzaileen karbono aztarna txikitzen du, bidalketa kopuru txikiagoa egin behar baitute eta garraiatzen den bolumena handiagoa baita. Horren ordainean, EROSKIk bere gain hartzen du igoera txiki bat stock kopuruan, zeina, gure arabera, konpentsatuta geldituko baita aurretik aipaturiko hobekuntza guztiekin.

Gure sare komertzialeko supermerkaturik iraunkorrena inauguratu dugu

2021aren amaieran, taldeak hamalau urte honetan irekitako supermerkaturik handiena inauguratu dugu, Gasteizen; 2.080 metro koadroko salmenta aretoa du. Gainera, gure sare komertzialeko saltokirik iraunkorrena da, eta energia eredu berri bat dakar gure saltokietarako.

Supermerkatuak lortu du denda estandar batek baino %50 energia gutxiago kontsumitzea, eta darabilen energia guztia osotara berriztagarria da. Gainera, haren eraikinetan, hondakinen %80k baino gehiagok hartzen dute balioa.

“Supermerkatu honek energia eredu berri baterako trantsizioa dakar gure denda sarera”.

Orain arte gauzatu ditugun jardueren bururatzea irudikatzen du denda honek, eta abiaburu bat da ingurumenaren eredu iraunkor bat zabaltzeko. Irekiera berriak egitean, eredu hau jarriko da martxan saltoki bakoitzean baldintza fisikoek horretarako modua ematen badute.

Supermerkatu honekin, indartu egin dugu ingurumena eta gizarte ongizatea errespetatuz jarduteko hartua dugun konpromisoa. Mugarri bat da energia trantsiziorako bidean, eta iraunkortasunari buruz egina dugun errepide orriarekin lerrokatuta dago. Orri horretan, Osasun eta Iraunkortasun arloko 10 Konpromisoak datoz, eta helburu gisa ezarria dugu 2050erako berotegi efektuko gasen emisio garbiak hutsean gelditzea.

Palmako sumendiaren erupzioak kaltetutakoei laguntzeko elkartasun kanpainak 435.000 € pasa lortu ditu

Gure sare komertzial osoan martxan jarri genuen larrialdiko kanpainari eta gure bezeroen elkartasunari esker, 435.000 euro baino gehiago biltzea lortu dugu Palmako Cumbre Vieja sumendiaren erupzioak kalteturikoei laguntzeko. Bildutako dirua Gurutze Gorriak bideratu du, hura ari baita zuzenean laguntzen ezbeharreko honek jotakoak.

Joan den hilean, bi ekimen jarri genituen martxan kanpainaren barruan. Batetik, jendea animatu genuen Kanarietako bananak kontsumitzera eta hala bananaren sektoreari eta hondamendiak erasandakoei laguntzera; alde horretatik, dohaintzan 0,10 euro emateko konpromisoa hartu genuen Eroski Natur markarekin salduriko kilo banana bakoitzeko. Bestetik, kontsumitzaileei elkartasuna eskatu genien, eta ordainlekuetan borondatea emateko mekanismo bat jarri genuen martxan.

“Bildutako dirua Gurutze Gorriak bideratu du, hura ari baita zuzenean laguntzen ezbeharreko honek jotakoak”.

Ekimen mota honek erakusten du nolako konpromiso indartsua duten gure bezeroek behartsueneganako eta aldi honetan Palmako herritarriei oinarrizko beharrak estaltzen laguntzeko, hala nola elikadura eta ostatua.

EROSKIn AGBa duen Kanarietako 12,5 milioi kilo banana inguru merkaturatzen dugu urtean. 2015etik EROSKI Natur markarekin ere saltzen dugu, eta urtean 5 bat milioi kilo erosten dugu. AGBa duen EROSKI Natur saileko Kanarietako bananen %95 Palmako uhartetik datoz; zehazki, 325 nekazari txikiren plantadietatik.

Produktu ekologikoen aldeko interesa goraka

Kontsumitzaileak aldatu egin du erosteko modua, gero eta kontsumo ohitura osasungarriagoak eta iraunkorragoak ari baita hartzen. Bio eta Eko produktuaetarako joera argia da etorkizunera begira, izan ere, horien eskaria sendotu ez ezik goraka doa, Euskal Autonomia Erkidegoan eta beste eskualde batzuetan bi digitu ere bai.

Guk eraldaketa horretan lagundu nahi diegu. Hala, azken urtean, EROSKIn ez bakarrik handitu dugu gure Eko eta Bio produktuen eskaintza —dagoeneko 1.500 erreferentziatik gora dira, fabrikatzaileen markenak eta gure EROSKI Bio eta EROSKI Eco markenak—; horretaz gainera, gure markako gama ekologikoa atera dugu, eta eskura dago bai gure denda sarean eta bai online supermerkatuan.

“Eco eta Bio produktuen eskaria sendotu ez ezik, goraka doa gure dendan”.

Balearrak, Katalunia eta EAE dira produktu biologikoen eta ekologikoen salmenta handienak dituzten hiru autonomia erkidegoak gure sare komertzialean; erkidego horietan dauden salmenta guztien %3 gutxi groabehera. Kopurua gero eta handiagoa da, eta eskualde horietan %5,4, %2,2 eta %17,2 igo da, hurrenez hurren, 2019aren aldean.

Gure supermerkatuak, bio/ekologikoak erosten dituztenen %45,1 hartzen dituztelarik, kanal fisikorik handiena dira mota horretako produktuetan. Online kanalean, Capraboacasa nabarmentzen da, bio/eko erosleen %50,1ekin.

Erosahalmen handiagoa dutenez, erretiratuek eta umeak handituta dituzten bikoteek bereizten dute diru gehien produktu bio/ekologikoak erosteko gure sare komertzialean gainerako soslai demografikoen aldean. Zehazki, bezeroen %20,5 eta %16,2 dira gure dendan horrelako produktuak erosten dituztenak.

Gure hornidura katearen eraginkortasuna podiumean dago kontsumo handiaren banaketan

Orain berriki, AECOC Fabrikatzaileen eta Banatzaileen Elkarteak Benchmarking Supply Chain-Kontsumo Handia 2019 azterketaren emaitzak argitaratu ditu, non fabrikatzaileek eta banatzaileek elkarrekin ebaluatzen baitugu hornidura katearekin zerikusia duten jardueren eraginkortasun maila.

Azterketaren helburua da kontsumo handiko fabrikatzaileen zerbitzu maila ezagutzea eskari-ordenaren kudeaketa prozesuan. Urtero egiten dute azterketa, eta soilik supply chain delakoari loturik diren jarduerak aztertzen ditu zertan hobetu daitekeen detektatzeko. Honako alor hauen balorazioa analizatzen da: plataformetara eramandakoan izandako zerbitzu maila; fabrikatzailearen Bezeroari Erantzuteko Guneko prozesuen eraginkortasuna; kudeaketa administratiboa, eta eraginkortasuna hobetzeko tresna estandarren erabilera; eta planifikazio eta kolaborazio prozedurak.

“Oso emaitza pozgarria da; izan ere, osasun krisiak jotako urte honetan izan da ebaluatua, eta proban jarri ditu logistikaren malgutasuna eta erresilientzia”.

Oraingo honetan, kontsumo handiko 23 banatzailek eta 30 fabrikatzailek parte hartu dugu. Fabrikatzaileen balorazioa aintzat hartuta, EROSKI hirugarrena da banaketa kateko eraginkortasunaren arloan, eta, hala, 2020ko postu bera erdietsi du. Analizaturiko alor garrantzitsuen artean, gure fakturazio sistema, kolaborazioa eta planifikazioa azpimarratzen ditu azterketak, baita truke sistema ere; eta alor horietan emaitza bikaina atera dugu, sailkapeneko hirugarren postura igotzeraino.

Era berean, nabarmentzekoa da CAPRABOren emaitza; horrek ere bere postuari eutsi baitio sailkapeneko laugarren tokian.

Meritu handiko emaitza da; izan ere, 2020an plataforma logistikoen mapa berria jarri dugu martxan, dendei zerbitzu optimoa ematera eta operazioetan eraginkortasuna handitzera bideratua.

Era berean, azterketak erakusten du garraiolarien itxarote denboren arloan fabrikatzaileen eskakizun bat dagoela; alde horretatik, plataformen harrera prozesuen hobekuntza plan bat landu dugu 2021ean. Ezarri diren neurriek eboluzio baikorra erakusten dute itxarote horiek kuantifikatzen dituen adierazlean, eta plataforman deskargatzen pasatu beharreko denbora maximoa betetzen dela ikus daiteke.

Oso emaitza pozgarria da; izan ere, osasun krisiak jotako urte honetan izan da ebaluatua, eta proban jarri ditu logistikaren malgutasuna eta erresilientzia. Pandemiatik irten garen honetan, hornidura katea tentsionatuta egon da; emaitza hau, berriz, gure kudeaketaren bermea da, eta aitortza bat, modua ematen diguna etorkizuneko erronka guztiei energiaz aurre egiteko.

Online supermerkatua eta bezeroari erantzuteko zerbitzua kontsumitzaileek sarituak

2021a agurtzeko gutxi falta da, eta gure irudipena baikorra da, kontsumitzaileek bezeroari erantzuteko zerbitzua eta online supermerkatua aitortu dituztelako. Biak ere sektoreko onenak direla adierazi dituzte, eta garrantzitsuena, erabakia kontsumitzaileek berek hartu dute. Hori guztia lortzeko, etengabe eboluzionatzen joatea izan da gure eredua. Alde horretatik, gure bezero bazkideen ekarpenak eskertu beharra dago, egunero hobetzen eta haien beharretara eraginkortasun handiagoz egokitzen laguntzen digutelako.

“Bezeroari erantzuteko zerbitzua eta online supermerkatua sektoreko onenak direla adierazi dute kontsumitzaileek“.

EROSKIri zortzigarrenez aitortu diote bezeroari erantzuteko zerbitzurik onena duela Sotto Tempo Advertising aholkularitza etxeak antolaturiko sariketan. Zehazki, bi sari jaso ditugu urri hasieran: ‘Bezeroari erantzuteko urteko zerbitzua’, bai Banaketa Handiaren kategorian eta bai Fidelizazio klubarenean. Kontsumitzaileek berek parte hartu dute hautespen horretan, eta 10,43 puntu eman dizkigute 12tik; bikaintasunetik hurbil kokatzen gaitu horrek.

“Hori guztia lortzeko, etengabe eboluzionatzen joatea izan da gure eredua. Alde horretatik, gure bezero bazkideen ekarpenak eskertu beharra dago, egunero hobetzen eta haien beharretara eraginkortasun handiagoz egokitzen laguntzen digutelako“.

Handik aste batzuetara, bosgarrenez irabazi dugu ‘Urteko Webshop’-aren saria, online supermerkatuen kategorian, 2021-2022ko Merkataritza Sariketan, aurten hamargarrenez egiten zutena. Espainian dagoen kontsumitzaile lehiaketarik handiena da, eta retailaren saileko merkatu azterketarik handienetako bat egiten du. Bozketan, honelako aldaerak baloratu dituzte kontsumitzaileek beren gogobetetze mailaren arabera: kalitate-prezio erlazioa, produktu sortaren ugaritasuna, bezeroarenganako zerbitzua, eskariak eramateko zerbitzua, promozioak eta eskaintzak, ordaintzeko erak eta erabiltzailearen esperientzia.

Gure marka propioak hiru sari jaso ditu “Salute to Excellence Awards” sariketan

Irailaren 1ean, EROSKIk hiru sari jaso ditu Salute to Excellence Awards nazioarteko sarien azken lehiaketan; Private Label Manufacturers Associationek banatu ditu Amsterdamen. Elikaduraren kategorian, gure EROSKI BIO espagetiak saritu dituzte, eta, elikaduratik kanpokoen kategorian, berriz, EROSKIren komuneko papera, erraz disolbatzen dena eta ezin hobea dena komun ontzi kimikoetarako. Orobat saritu dute Etxeko Animalientzako Elikagaien eta Produktuen kategorian, Grain Free, oilasko freskoa kopuru handitan duen katuentzako janari esterilizatua, EROSKI markakoa.

“Lehiaketak bikaintasuna aitortzen du banatzaileak bere markan darabiltzan kalitateagatik, berrikuntzagatik eta ontziagatik, eta aurten 23 herrialdetako 600 produktu baino gehiago aztertu ditu, joan deneko urte batean atera direnen artean”.

Salute to Excellende Awards sariketa munduan dagoen lehiaketarik handiena da, esklusiboki marka propioak aztertzen dituena Europa osoko supermerkatuetan, hipermerkatuetan, deskontu dendetan, drogerietan eta denda espezializatuetan. Hala, banatzaileek azken urtean beren markarekin saldutako produktuen kalitatearen, berrikuntzaren eta ontziaren bikaintasuna aitortzen ditu. Aurtengo lehiaketan, 23 herrialdetako 600 produktu baino gehiago aztertu dituzte urtebete honetan; honela esan du PLMAko presidenteak, Peggy Daviesek: “Erakusten du haren garapenean, saioetan eta komertzializazioan parte hartzen dutenek azken kontsumo joerak ezagutzen dituztela”.

Hobetu egin dugu markak eta kontsumitzaileak elkarrekin duten lotura

Markaren pertzepzioaz egin dugun azken azterketako datuek berresten dute EROSKIren marka posizio onean dela eta kontsumitzailearekin duen lotura estutzen ari dela.

Kontsumitzaileen ikuspegiz, tokian tokiko produktuak erosteko modua ematen die EROSKIk, eta bezeroari entzuten dio; gainera,  kezkatuta dago jendearen osasunean eta ongizatean; sektoreko batezbestekotik gora. Aurtengo bigarren seihilekoan azterketa zorrotz bat egin dugu kontsumitzaileek marka nola hautematen duten jakiteko eta haien premietara hobeto egokitzeko, eta huraxe izan da azterketako ondorio nagusietako bat.

“Kontsumitzaileek aitortzen dute EROSKI ahalegintzen dela inguruneko produktuen aukera zabala izaten eta tokian tokiko ekonomia bultzatzen”.

Kontsumitzaileek ongi baloratzen dute gure denda sarean egindako erosketen esperientzia; langileak, berriz, profesionaltzat dituzte eta haien jarrera eta harrera ona estimatzen dituzte, zergatik eta, besteak beste, ongi hartzen baitituzte, entzun egiten baitiete eta dituzten beharrei erantzun.

EROSKI ongi ikusten dute, halaber, eskualdeko elikagaien aukera zabala dagoelako eta inguruneko ekonomia bultzatzen dutelako. Eta elikadura osasungarria, osoa eta orekatsua eramateko dendan dituen produktuen eskaintzarengatik ere bai.

Gainera, kontsumitzaileek 2020an baino are hobekiago ikusten dituzte gure eskaintzak eta promozioak.

CAPRABOren plataforma logistikoetan salgaiak jasotzeko prozesua optimizatu dugu

Eraginkortasuna hobetzea da ardatzetako bat gaur egun dugu plan estrategikoan. Helburu horrekin batera, bi ekintza gunetan jarria dugu arreta, gaur egun, arlo logistikoaz ari garela: nola sinplifikatu eta eraginkorrago bihurtu saltokietako operazioak eta nola diseinatu hornikuntza sistema gero eta eraginkorrago bat.

Bigarren ekintzari dagokionez, maiatzean, plan bat abiatu genuen salgaiak jasotzeko plataformetan darabilgun prozesua hobetzeko. Hortaz, fabrikatzaileen eskaerari erantzun genion, garraiolariak zain egon beharreko denbora optimizatzen baita horrela. Zamalana leuna izan dadin laguntzen duen parrilla bat eratu dugu, eta salgaiak jasotzeko operatibak berrikusi eta optimizatu ditugu. Era berean, garrantzitsua da gure hornitzaileek eurei dagozkien baldintzak betetzea.

“Aurreneko emaitzek erakusten dute %10-15 hobetu dela garraioek zain eman behar duten denbora”.

Oraingoz, Elorrioko eta Abrerako plataforma logistiko orokorren prozesuetan ezarri ditugu hobekuntza horiek, bai eta CAPRABOko, Jundizko eta Zaragozako plataformetako hozte prozesuetan ere. Gaur egun, haragiaren eta frutaren prozesuetara ari gara zabaltzen, orobat Zaragozako salgai orokorren plataformara ere.

Operatiba fintzeko prozesuan jarraitzen badugu ere, paraleloan, hornitzaileak puntualtasuna hobetzen ari dira; lehenbiziko emaitzek erakusten dute %10-15 hobetu dela garraiolarien itxaronaldia, eta deskargarako denbora maximoa 2 ordukoa ezarri du plataformak.

Guztiz ezabatu dugu palma gantza gure markako produktuetan

Jarraitzen dugu elikadura osasungarri eta orekatsu baten aldeko eredua indartzen; alde horretatik, palma gantza kendu dugu gure markako produktuetatik. Guztira, 43 fabrikatzaileren 308 produktu birformulatu dituzte lau urte pasa iraun duen lanean, eta dagoeneko eskura daude gure denda sare osoan.

Gauzak horrela, jarraitzen dugu pausoak emanez elikadura osasungarria eta orekatsua markaren bidez merke eskaintzeko bidean. Helburu hori ezin utzizkoa zen, eta 2018an berritutako Osasunaren eta Iraunkortasunaren aldeko 10 konpromisoen parte.

“Gure Batzorde Zientifikoak eman dio balekoa ekimenari; hark bermatzen du osasunean eta elikaduran egiten diren proposamenek betetzen dituztela komunitate zientifikoak seinalatzen dituen beharrak eta lehentasunak“.

Birformulatutako produktu gehienetan, oleiko ugariko ekilorearekin ordeztea hautatu dugu, ia palmak bezainbat harrotu eta testura bertsua ematen baitu; hala, gantz saturatu kopurua jaisten du %80raino, eta %55eraino zenbait galleta eta zerealetan. Hura ordezkatzeko, elkarrekin lan egin dugu gure produktuak ekoizten dituzten fabrikatzaileekin eta kremak, margarinak, hostopilak, esnegainak, txokolate estalkiak eta abar egiteko lehengaiak ekarten dituzten hornitzaileekin. Lan handia egin dugu, eskuz esku, EROSKIko teknikariek eta gure hornitzaileen I+G, Kalitate Eta Produkzio arloko taldeek. Guztira, ehun lagunek baino gehiagok batu dituzte ahaleginak proiektu honetan, eta arrakasta erdietsi dugu modu aurrendarian.

Ekimen horri balekoa EROSKI Fundazioaren Batzorde Zientifikoak eman dio, gure aholkularitza organoa bera. Hura arduratzen da osasun eta elikadura arloko proposamenei bermea emateaz eta komunitate zientifikoak seinalatzen dituen behar eta lehentasunen araberakoak direla ziurtatzeaz.