Category: Gaurkotasuna zure hurbil

Lean & Greenen izarra lortu dugu aurrenekoz CO₂ emisioak gutxitu ditugulako gure prozesu logistikoetan eta garraioan

Ekoizleen eta Banatzaileen Elkarteak aurreneko Lean & Green izar bat eman digu CO2 emisioak %20 murrizteko helburua gainditzeagatik gure logistika eta garraio prozesuetan. Hala, iragarritakoa hobetu ez ezik —%25era iritsi gara—, soilik 4 urte behar izan ditugu, Lean & Greenek 2018an saritutako ekintza planak 5 urteko epea bazekarren ere.

Horniketa-kateak eragiten dituen igorpenak murrizteko plataforma berezia da Lean & Green, Europan dagoen handiena. Nazioarteko eta lanbide arteko ekimen bat da, helburu duena enpresei laguntzea berotegi efektuko gasak gutxitzen; horrekin batera, asmoa da helburu zenbakarri bat iristen laguntzea eta beste enpresa batzuekin maila nazionalean bezala Europa mailan lankidetzan aritzea, baita jardunbide onak partekatzea ere, eta iraunkortasunaren erreferente izatea, segimendu sistema garden eta jarraitzeko moduko baten bidez.

“%25 baino gehiago murriztea lortu dugu gure jarduera logistikoaren emisioak; horrek esan nahi du 25.800 tona CO2 baino gehiago saihestu ditugula nola eta gure garraio eredu berrian egindako ekintzei esker; izan ere, eraginkortasunean eta iraunkortasunean jarri dugu ardatza”.

Parisko Hitzarmenean zehazturiko helburuekin lerrokatuta dago ekimena, 2050erako karbono emisio neutroak lortzeko. Lean & Green programaren egiturak bost maila ditu, karbono emisioak gutxitzeko helburu zenbakarriekin. Maila bakoitzeko helburuak lortu ondoren, enpresak saritzen dira izarrekin.

“Logistikak ere gure lan eta kontrol prozedurak indartzen eta eguneratzen lagundu dezake eta lagundu behar du, eta hor ingurumena aintzat hartzen da Osasun eta Iraunkortasun konpromisoak betetzeko orduan”, esan du EROSKIren Operazioetako zuzendariak, Alberto Madariagak. “Lean & Green ekimena ezin hobe ezkontzen da erakundearen helburu orokorrarekin; hau da, berotegi efektuko gasen emisioa gutxitzea. “Lau urte honetan bakarrik, EROSKIk %25 baino gehiago murriztu ditu bere jarduera logistikoaren emisioak; horrek esan nahi du 25.800 tona CO2 baino gehiago saihestu ditugula nola eta gure garraio eredu berrian egindako ekintzei esker; izan ere, eraginkortasunean eta iraunkortasunean jarri dugu ardatza”, azaldu du Madariagak.

EROSKIn ekintza bat baino gehiago jarri ditugu martxan, markaturiko helburuak erdiesteko. Ibilgailu berriak erosi ditugu (gasezko ibilgailuak, megakamioiak, flota berriak…) eta lan prozedura berriak jarri ditugu gure eraginkortasuna hobetzeko, betetzeak handitzeko eta hutseko bidaiak gutxitzeko.

Gure prozesu logistikoetako eraginkortasun energetikoa plataformei lotua dago: eraikuntza iraunkor baten alde egin dugu, eta energia aldetik eraginkorragoak diren ekipoekin hornitu; hala, ingurumenean egiten duten inpaktua txikiagoa da. Esaterako, LED argiztapena jarri dugu, mugimendu detektagailuak, tenperaturaren robotak, kutsatzen ez duten hozte gasak eta argi naturalaren aprobetxamendua, plataformen eraginkortasun energetikoa hobetzeko. Gainera, gure helburua da energia berdea erostea; gaur egun gure plataformen %20tan darabilgu dagoeneko. Beste alde batetik, hondakinak kudeatzeko ereduan, ekonomia zirkularraren printzipioak darabiltzagu. Hondakinak alferrik ez galtzeko konpromisoa zintzo betez, lanean ari gara sortzen ditugun hondakinak gutxitu eta berrerabiltzeko, birziklatzeko edo saihestu ezin diren hondakinak berriz baloratzeko. Horretarako, 46 milioi ontzi logistiko berrerabiltzen ditugu urtean gure plataformetan, eta sortzen ditugun hondakinak birziklatzen direla bermatzen dugu alderantzizko logistikaren eta gestore baimenduen bidez.

Gure zabalkunde erritmoa espero bezala doa, 2020an 52 frankizia inauguratuta

Gure hedapen plana aurrera doa, eta esperotako erritmoan eman diogu bultzada ‘Zurekin’ eredu komertzialari. Hala, denda propioen sarean abiarazitako eraldaketarekin batera, iaz 52 frankizia inauguratu genituen. Guztira, 7,8 milioi euro inbertitu ditu, eta 312 lanpostu sorrarazi.

Autonomia erkidego hauetan egin ditu kooperatibak inaugurazio gehienak: Katalunia (9), Madril (8), Andaluzia (7), Balearrak (6), Nafarroa (5), Galizia (4) eta EAE eta Valentzia hiruna irekierarekin. Horien ondotik datoz, Aragoi, Gaztela eta Leon eta Errioxa bina irekierarekin eta, azkenik, Kantabria eta Gaztela-Mantxa frankizia hartzaile banarekin.

“Gure asmoa da aurten beste 70 bat frankizia inauguratzea”.

Aurreko urteetako irekieren erritmoari eutsi diogu, eta, sei urte honetan, 340 inaugurazio egin ditu; hortaz, gaur egun, frankizia erako 500 supermerkatu baino gehiago ditu. Hala, jarraitzen dugu frankizien sarea hedatzen, fokua lurralde hauetan ipinia dugularik datozen urteetarako: Andaluzia, Madril, Gaztela-Mantxa, Extremadura eta Levante. Gure asmoa da aurten beste 70 bat frankizia inauguratzea.

EROSKIren frankizia erako formatu komertzialetan dagoen azken berrikuntza Rapid da, 2017an inauguratua. Komenentziako autozerbitzu bat da, ordutegi zabala duena, hamabost ordu egunero zabalik (08:00-23:00), urteko 365 egunetan eta metro koadroko dagoen eskaintza komertzialik zabalena dauka, 3.600 erreferentzia baino gehiagorekin. Horrela, kontsumitzailearen 800 bat premia estaltzen ditu. Rapid frankizien sarea guztira 28 dendak osatzen dute, eta zerbitzuguneetan, hondartza aldean, unibertsitatean eta hirigunean daude kokatuta. Sarea hedatzeko datozen planetan, honako lurralde hauek sartuko dira: Madril, Levanteko kostaldea, Andaluzia, Balear uharteak, EAE, Nafarroa eta Errioxa.

2020ko ekainean, lankidetza hitzarmen bat sinatu genuen AVIArekin, RAPID erako supermerkatu gehiago irekitzeko petrolio operadoreak Espainian dituen zerbitzuguneetan. Orain arte, EROSKI Rapid erako hamar denda ireki ditugu AVIA gasolindegietan, eta honako lurralde hauetan daude: Euskal Autonomia Erkidegoa, Madril, Errioxa, Nafarroa eta Valladolid. Aurtengo hedapen planean, gasolindegietan beste hamabost denda irekiko ditugula jasota dugu.

Martxan jarri da freskoen plataforma logistiko berria Araban

Hilabete eskas du freskoen plataforma logistiko berriak Jundizen (Gasteiz) funtzionatzen hasirik. Energiaren eraginkortasunaren arloan, puntako instalazioak ditu, eta freskoen kudeaketa zentralizatzen du bere 15.600 metro koadroetan. Osotara hoztua dago, eta EROSKIren 300 denda baino gehiago hornitzen ditu Araban, Bizkaian eta Gipuzkoan.

Egunero 400 tona produktu fresko kudeatzeko gauza da banaketa gune berria; horrek sendotu egin du tokiko produktuen gamarik zabalena ez ezik kalitaterik oneneko freskoak eskaintzeko dugun espezializazioa eta konpromisoa.

20 milioi euro inbertitu ditugu freskoen plataforma berrian, eta 150 bat langile ari dira hartan. Instalazio berri hau proiektu orokorrago baten parte da, gure freskoen plataformen mapa berriz diseinatzen ari baikara iparraldean. Logistika modernizatzearekin batera, ingurumenarekiko errespetu handiagoz jokatuko dute instalazioek, teknologia gaurkotuarekin hozte ganbera eraginkorragoak izango baitituzte, eta konfort eta segurtasun handiagoak emango dizkiete bertan lan egiten dutenei. Hala, errotik hobetuko da prozesuen eraginkortasuna eta horrek modua emango digu bezeroen etorkizuneko eskari posibleak hartzeko (irekierak, gama hazkuntzak, online komertzioa…); hala berean, gure dendetara joan behar duten produktuei tratamendu hobea eman ahalko diegu, laburtu egingo baita jatorrian ateratzen denetik kontsumitzailearen eskuetara iristeko behar duen denbora.

“Egunero 400 tona produktu fresko kudeatzeko gauza da banaketa gune berria; horrek sendotu egin du tokiko produktuen gamarik zabalena ez ezik kalitaterik oneneko freskoak eskaintzeko dugun espezializazioa eta konpromisoa”.

Instalazio berriak diseinatzeko orduan, aintzat hartu ditugu LEED GOLD nazioarteko ingurumen ziurtagiri ospetsuaren arauak eta baldintzak; hori da proiektu honen helburua, eta lortuz gero, ziurtatuko dugu ekoefizientzia eta iraunkortasun estandar zorrotzak beteta egina dagoela eraikina.

Rosa Carabel, EROSKIko zuzendari nagusia

EROSKIn 2021-2024 Plan Estrategikoa abiarazi dugu; ohikoa den bezala, gure antolamendu egitura berregokitzearekin batera. Rosa Carabelek, Salmenten Sare Komertzialeko zuzendaria bera azken aldi estrategikoan, taldearen zuzendaritza orokorra hartu du bere gain, zeina zuzenean baitago Agustin Markaide buru duen taldearen lehendakaritza exekutiboaren mende.

Zuzendaritza Kontseiluak kide berriak hartuko ditu gaur egungo arloetako zuzendaritzetatik. Hala, hartan sartu dira Operazioetako zuzendaria, Alberto Madariaga; Berrikuntzako, Eraldaketa Digitala eta Informazioaren Teknologien arloko zuzendaria, Enrique Monzonis; zuzendari ekonomiko-finantzarioa, Jose Ramon Anduaga; eta Garapen zuzendaria, Javier España. Honako hauek osatuko dute Zuzendaritza Kontseilu berria: zuzendari soziala, Iñigo Eizaguirre; zuzendari komertziala, Beatriz Santos; eta Marketin Estrategikoa eta Bezeroaren arloko zuzendaria, Eva Ugarte; jada lehengo Zuzendaritza Kontseiluko kideak zirenak.

Antolamendu egitura berriak zuzendaritza korporatibo bat sortzea dakar, hori ere lehendakaritzaren mende, Javier Amezaga buru duelarik.

Gure online kanalak konfinamenduan lortutako hazkundeari eutsi dio, eta 2020a tamaina bikoiztuta itxi du

Etxeko konfinamendua, pandemiaren eraginez, bultzada bat izan da online kanalerako. Kontsumitzaileek erosketa ohiturak aldatu zituzten, eta garrantzia hartu dute guztitarako kanalek; urte batzuk daramatza EROSKIk ildo horretan gogor lanean. Gure online erosketa kanalek eginahalak egin dituzte eskari hazkunde horri aurre egiteko, inoiz baino bizkorrago handitu baitira.

Elikagaiak era digitalean erosteko joera egonkortu egin zen aldirik kritikoena igarota, baina kopuru handietan eutsi dio urte amaierara arte, eta hazkundea sendotu egin da. Hala, gure online kanalak bikoiztu egin ditu salmentak 2020an.

Erabiltzaile kopurua ere handitu egin da bi digitu, %43 pasa igo baita. Nabarmantzekoa da nolako hazkundea izan duen 65 urtetik gorakoen talde soziodemografikoak. Nahiz eta kanalean gehiengoa ez izan, hura handitu da gehien online alorrean, eta orain kanaleko erosle guztien %10 dira.

“Gure online kanalak bikoiztu egin ditu salmentak 2020an, eta erabiltzaileak %43 pasa igo dira”.

Gure Interneteko supermerkatuan, bikoiztu egin dira erosketak aurreko urtearekin alderatuta,  eta online saskiaren zenbatekoa batez beste 5,6 handiagoa izan da saski fisikoarekin alderatuta.

“Eroski Suma” jarri dugu martxan, zabalpenerako proiektu bat, Basque Culinary Centerrekin batera gauzatua

Orain berriki, lankidetza hitzarmena berritu dugu Basque Culinary Centerrekin, beste lau urterako; horri esker, hainbat proiektu landu eta lankidetzarako esparruak sortuko dituzte gastronomiaren arloan berrikuntza eta formazioa sustatzeko. Hortaz, sendotu egin dugu proiektuak eta ekimenak elkarrekin sustatzeko konpromisoa, eta formazioan eta ikerkuntzan jarriko dugu indarra, gastronomiaren inguruko ezagutza gizarteratzeko, besteak beste gazteen eta familien artean, osasuna eta iraunkortasuna erdigunean jarrita.

Alde horretatik, martxan jarri berri dugu, gure hornitzaileekin batera, “EROSKI suma”, zabalpenerako proiektu berri bat, helburu duena eragileak mahai inguruetan elkartzea, besteak beste lantzeko elikaduraren eta gastronomiaren sektoreko gaurkotasuneko gaiak, gai estrategikoak eta gizartean garrantzia dutenak, ezagutza partekatu eta debatea sorrarazteko asmoz.

Lehen urtea online egin dugu pandemiaren murriztapenak zirela medio, eta hain zuzen ere hori bera landu dugu honako ikuspegi honetatik: “Tokiko ekoizlearen begirada pandemia honetan”. Alde horretatik, partaide izan ditugu Somalo hestebeteen CEOa, Elena Martinez; Zelaia sagardotegiko arduraduna, Oihana Gaincerain; eta Rafa Gorrotxategi gozogile maisua; hala, BCCko proiektu arduradun eta gastronomia arloko aholkulari Imanol Zubelzuk moderatutako mahai inguruan, beren bizipenak kontatu dituzte, nolako aldaketak egin behar izan dituzten eta nolako erronkak izan dituzten konponbideak bilatzeko orduan.

“EROSKI suma zabalpenerako proiektu berri bat da, helburu duena ezagutza partekatu eta debatea sorraraztea elikadurari eta gastronomiari buruz”.

Horretaz gainera, produktuen kalitatearekin eta proiektu eta berrikuntzekin zerikusia duten proiektu askotan dihardugu. Zehazki, BCCk era aktiboan parte hartzen du gure SELEQTIA gourmet markako produktuei testak egiten. Profesional adituek dastatu egiten dituzte elikagaien alderdi sentsorialetik aztertzeko BCC INNOVATIONen, munduan lehen Zentro Teknologikoa gastronomia ardatz duena. Era berean, I+G+b proiektuetan ere lankidetzan ari gara, garapen teknologikoa, berrikuntza eta sustapena landu eta balio erantsia duten produktuak lortzeko.

Gure eguberrietako kanpainak tokiko produktu sailak bultzatu ditu eta salmentak ia %16 igo dira

Eguberrietako kanpaina honetan, pandemia dela-eta hain berezia izan denez, lehen baino are gehiago saiatu gara pizten gure denda sareko tokian tokiko produktuen salmenta. Horretarako, tokian tokiko sailetan jarri dugu ardatza, berritasun guztiak aurkeztuta eta haien kalitate eta propietateak balioan jarrita, orobat tokian tokiko ekonomian duten garrantzia.

Kanpainaren balantzea oso baikorra izan da, eta tokian tokiko produktuen salmentak %15,8ko igoera izan du 2019ko Eguberriekin alderatuta. Atal guztiak igo dira %10etik gora.  Zehazki, freskoak %15 pasa igo dira, batez ere harategikoak eta frutaren eta barazkiaren atalekoak, eta sukalderako irtenbideak %17 inguru igo dira. Bestalde, arrandegian eta urdaitegian %13tik gorako igoerak izan dituzte.

“Tokian tokiko produktuen salmenta %15,8 igo da Eguberrietan”.

Nabarmentzekoa da tokian tokiko edarien salmenta %29 igo dela; izan ere, hitzarmenak ditugu eskualde guztietan jatorri izenak dituzten upategi printzipalekin.

Eguberri kanpaina itxita, %6,6 handitu dira elikagaien salmentak eta kontsumitzaileek aldatu egin dute bere portaera

Eguberriak lehenengoz pandemiarekin igaro ditugun honetan, kontsumitzaileek aldatu egin dute portaera, eta litekeena da datozen urteetan joera horrek bere horretan irautea. Erosketei aurrea hartzea izan da bat. Eguberrietan, %4,4 igo dira salmentak aurreko urtearekin alderatuta. Eta 2019aren aldean, hazkuntzarik handiena abenduaren 8ko astean izan zen; horrek erakusten du bezeroak aurreratu egin zituela erosketak.

Elikagaiak izan dira Eguberrietan gehien saldu diren produktuak, izanez ere, %6,6 igo dira 2019arekin alderatuta. Igoera garrantzitsua izan dute, halaber, garbitasuneko eta zainketa pertsonalerako produktuek; gehien igo direnak sendagai kutxa, xaboia, desinfektatzaileak eta toallatxoak.

“Elikagaiak izan dira Eguberrietan gehien saldu diren produktuak, izan ere, %6,6 igo dira 2019arekin alderatuta”.

Demografiari erreparatuta, berriz, gazte eta heldu independenteek handitu dute gehien erosketa erritmoa, hurrenez hurren %16,6ko eta %10eko igoera izan baitute. Alabaina, erretiratuen kasuan, apaldu egin dira haien erosketak Eguberrietan; hortaz, susmatzekoa denez, erosketen migrazio bat gertatu da, eta gazteek egin dituzte familiako erosketak.

Ciudadanos Saria jaso dugu covid-19an elkartasun portaera eta balioena aitortuta

Pandemian hornidura eta segurtasuna bermatzeko konpromisoa dela eta, aitorpena egin digute 26. Ciudadanos Sarietan; bertan, saria eman digute “2020ko gertaera, COVID-19, elkartasun entitate pribatua” kategorian. Irabazi asmorik ez duen Ciudadanos Sarien Elkarteak eman digu, balioan jarriz: “Entitate eta kolektibo profesionalek muturreko egoeran egindako lan eta ahalegin profesionala, herritarrenganako elkartasun portaera eta balio eredugarriak”.

Hauxe adierazi zuen Enrique Baronek, Europako Parlamentuko presidente ohi eta sarien epaimahaiko kideak: “EROSKIk nolako konpromisoa erakutsi duen koronabirusak jota gauden honetan, besteekin partekatuz bere dendetan hartu dituen ekinbideak —bai langileen eta bezeroen osasuna zaintzeko eta bai lehen mailako artikuluen hornitzaile gisa duen zeregina eta kalitatea bermatzeko—, osasun agintariekin egunero kontaktuan egonez laster jarduteko eta gertakizunei aurre hartzeko“.

Sari banaketan, Madrilen, EROSKIren Osasun eta Iraunkortasun arloko zuzendariak hartu zuen saria, Alejandro Martinez Berriochoak, eta hauxe gogorarazi zuen: “Erlojuaren kontrako lasterketa egin genuen erabakirik onenak hartzeko alarma egoera deklaratu zutenean”. Inoiz ere horrelakorik ikusi gabeko egoera batean erantzunak bilatzeko erabakiak izan ziren, bere buruari nahitaezkotzat jota bere dendetan hornidura bermatu behar zuen EROSKIk, langileen eta bezeroen segurtasuna ahalik eta gehien bermatzen saiatzeko. Prebentziozko neurriak hartzeko orduan, protokolo zorrotzak ezarri behar izan ziren, arriskuak gutxitzeko xedez, hala nola jende kopurua mugatu, segurtasun distantziak ezarri, babes elementuak banatu, pantaila babesleak ipini, erosteko ohituren gaineko aholkuak eman… Tentsioa izugarria izan zen elikagaien kate osoan, baina katebegi guztien lankidetzarekin lehen mailako ondasunen hornikuntza bermatu ahal izan zen.

“Sariarekin aitortu egin digute egindako lan eta ahalegin profesionala, herritarrenganako elkartasun portaera eta balio eredugarriak erakutsi ditugulakoan”.

Hala berean, sariak banatzeko orduan, zera gogorarazi zen, EROSKI nolako eginahala egiten ari den bere jarduera kolektiboaren mesedetan bideratzeko, gizartearen aldeko elkartasunari bide emanda eta bereziki behartsuenen alde. Izan ere, EROSKI elkartasun ekintza asko gauzatzen ari da osasun krisia eragiten ari den ondorioak gizarteko sektorerik zaurgarrienetako batean gutxitzeko helburuz. Esaterako, elikagaiak eta higiene produktuak biltzea bazterketa soziala jasateko arriskuan diren kolektiboentzat besteren artean FESBAL eta Gurutze Gorriaren bitartez;  elikagaien, maskaren, arroparen eta abarren doaintzak egitea; eta familia ugariei laguntzak ematea.

Gure hornidura katearen eraginkortasuna hiru onenetan dago kontsumo handiaren banaketan

AECOC Fabrikatzaileen eta Banatzaileen Elkarteak bere urteroko azterketaren emaitzak argitaratu ditu, Benchmarking Supply Chain 2020, non fabrikatzaileek eta banatzaileek hornidura katearekin zerikusia duten jardueren eraginkortasun maila ebaluatzen baitute. Tresna horrek modua ematen du indarguneak eta ahulguneak fabrikatzailearen ikuspegitik identifikatzeko eta prozesuak nola hobetu detektatzeko.

Aldi honetan, parte hartu dute kontsumo handiaren alorreko 23 banatzailek, elikagaien eta hoztearen alorreko 31 fabrikatzailek eta izoztuen sektoreko 14 fabrikatzailek. Honako alor hauen balorazioa aztertu dute: plataformetara eramandakoan izandako zerbitzu maila, fabrikatzailearen customer service guneko prozesuen eraginkortasuna, kudeaketa administratiboa eta eraginkortasuna hobetzeko tresna estandarren erabilera eta planifikazio eta kolaborazio prozedurak. Balorazio horrek EROSKI jartzen du hirugarren postuan hornidura katearen eraginkortasunari dagokionez; horrek esan nahi du postu bat hobetu duela 2019tik hona. Analizaturiko alor garrantzitsuen artean, azterketak nabarmentzekoak ditu gure fakturazio sistema eta kolaborazio eta planifikazio prozesuak, baita truke sistema ere, eta alor horietan emaitza bikaina atera dugu, sailkapeneko hirugarren postura igotzeraino.

Era berean, CAPRABOren emaitza nabarmentzen du; horrek ere bere postua hobetu du sailkapeneko laugarren tokiraino. Balorazio horrek fabrikatzaileek sumatzen duten hobekuntza berresten du, eta prozesu logistikoen hobekuntzaren eta homogeneizazioaren ondorio da.

“Analizaturiko alor garrantzitsuen artean, azterketak nabarmendu beharrekotzat ditu gure fakturazio sistema eta kolaborazio eta planifikazio prozesuak, baita truke sistema ere, eta alor horietan emaitza bikaina atera dugu, sailkapeneko hirugarren postura igotzeraino”.

Gainera, aurten beste atal bat gaineratu dute, zeinetan banatzaileek COVID-19aren osasun krisian egindako kudeaketa ebaluatzen duten, eta oso balorazio ona jaso dugu EROSKIren eta CAPRABOren kudeaketagatik. Emaitza horiek arlo logistikotik egindako lanaren aitorpen garrantzitsua dira, eta erakusten dute nolako garrantzia duen fabrikatzaileak eta banatzaileak elkarrekin lan egiteak eta bien arteko gardentasunak, giltzarrizkoa orain arte ikusi gabeko pandemia honi aurre egiteko.