ZeroW, elikagaien galera eta alferrik galtzea zerora murrizteko berrikuntzak

ZeroW EBren 12 milioi euroko proiektua da, berrikuntza sistemikoen bidez elikagaietan zero galera izateko helburuz sortua, eta Horizon 2020 Programaren Green Deal deialdiaren bidez finantzatua.

Proiektuak 2022tik 2025era bitarteko iraupena du eta 17 herrialdetako 46 alderdi interesdunen arteko lankidetzan ezartzen da.

ZeroWk irtenbide sinesgarriak emango ditu elikagaien murrizketa eta alferrik galtzea nabarmen gutxitzeko —horretarako elikadura-sistemako eragile guztiak lankidetza-esparru batean inplikaraziz—, era horretan bidezko trantsizioa bizkortzeko guztiontzako elikagai-sistema sozialki, ekonomikoki eta ingurumenarekiko jasangarri baterantz.

Erakusten diren ZeroWren soluzio berritzaileetan txertatua eta aintzat hartua dago herritar guztiei, baita talde kalteberei ere, elikagai seguruak, nutritiboak eta eskuragarriak emateko elikadura-sistemek betetzen duten eginkizuna. 

Ontziratutako produktuen bizitza baliagarria luzatzeko eta izakinen kudeaketa errazteko ontziratze-soluzioa.

EROSKIk, besteak beste, arrain urdina ontziratzeko soluzio berritzaile baten garapenean hartzen du parte. Soluzio hori material konpostagarrietan oinarritua dago eta elikagaiak alferrik galtzea gutxitzen laguntzeko freskotasun-etiketa bat erabiltzen du. Elikagaiak alferrik galtzeak sortzen duen arazo larria konpondu nahi da Living Lab horretan. Horretarako, supermerkatuetan arrain freskoaren bizitza baliagarria zehaztu nahi da.  

2020an, FAOk Arrantzaren eta akuikulturaren munduko egoera. Jasangarritasuna ekinean txostenean zenbatetsi zuenez, arrantzaren eta akuikulturaren harrapaketen % 35 inguru murrizten edo alferrik galtzen da urtero.

Gainera, Europako Batzordeak egindako merkatu-azterketa baten arabera (datak markatzeak eta elikagaien etiketetan beste informazio bat emateak elikagaiak alferrik galtzea prebenitzearekin duten loturari buruzkoa), EBn urtero sortzen diren 88 milioi tonako elikagai-galeraren % 10en arrazoia da etiketako datak ez ulertzea edo gaizki interpretatzea.

Arrantza-produktuen iraungipena zehazteko eta behar bezala etiketatzeko soluzio adimentsuago bat aurkituz gero, beharrezkoak ez diren hondakinak murriztu ahal izango ditugu eta gure ozeanoetako faunaren gaineko presioa gutxitu ahal izango dugu.

Arrain fresko koipetsuarentzat konpartimentuak dituen erretilu bat diseinatuko da, eta, horri esker, ez da beharrezkoa izango kuxin xurgatzaile ez-birziklagarri bat erabiltzea arrainaren exudazioa atxikitzeko.

Gainera, freskotasun-etiketa kolorimetriko bat eta irakurketa-aplikazio bat txertatuko dira, bizitza baliagarria doitasun handiagoz zehazteko eta produktua oraindik kontsumorako segurua denean iraungitze-data luzatzeko. Etiketa horren helburua da adierazpen bisualaren bidez (kolore-aldaketa) produktuari geratzen zaion bizitza baliagarria adieraztea. Horrek produktuaren egoerari buruzko informazioa emango die txikizkariei, eta izakinen kudeaketa hobea egiten lagunduko die.

Jarraitu proiektuaren komunikabide sozialen kanalei: Twitter, LinkedIn eta YouTube