EKOPACK GAZTA proiektua Gipuzkoako Foru Aldundiak proposatzen duen Etorkizuna Eraikiz – Misioak 2023 Programaren Elikatze-kate eraginkor eta zirkularra gai-arloaren barruan kokatzen da. EKOPACK GAZTA proiektuaren helburua da elikagaien industrian birziklagarriak ez diren ontziek eragindako ingurumen-arazoari heltzea, tokiko ekoizpen jasangarrian eta Gipuzkoako eskualdeko artzain-gazten kontsumo arduratsuan oinarrituta. Hori lortzeko, sektore anitzeko lankidetza-proiektu bat gauzatuko da, elikatze-kateko eragile guztiak barnean hartzen dituena, hala nola gaztandegi txikiak, ARTZAI GAZTA elkartea, Idiazabal Jatorrizko Deitura Babestuaren Kontseilu Arautzailea eta EROSKI. Elikatze-kateko eragileen arteko lankidetzak bermatuko du Gipuzkoan gazten ekoizpenean eta kontsumoan kate eraginkor eta jasangarri bat garatzea. Lankidetza horren bidez, ekoizleek, prozesadoreek, banatzaileek eta kontsumitzaileek modu aktiboan eta koordinatuan parte hartzen dute, eta elkarrekin lan egiten dute gaztagintza-industriak eta Gipuzkoako gizarteak aurrez aurre dituzten erronkei aurre egiteko.

Helburua da gaztandegi txikietan ontzi biodegradagarriak ezartzea, ingurumen-inpaktua murrizteko eta sozialki arduratsuak diren ekoizpen-jarduerak sustatzeko. Gainera, ekintza honen bidez, kontsumitzaileak kontzientziatu nahi dira ingurumena errespetatzen duten bertako produktuak (gaztandegi hauetan ekoitzitako gaztak, adibidez) aukeratzearen garrantziaz. Jardunbide horiek iraunkorragoak direnez, gaztandegiek onurak izan ditzakete ingurumenari, gizarteari eta ekonomiari dagokienez, eta ingurumena babesteko eta Gipuzkoan elikadura-sistema iraunkorragoa sustatzeko ahalegin kolektiboari lagundu diezaiokete.