EROSKIk eta IKERLANek hitzarmen estrategiko bat sinatu dute berrikuntza teknologikoaren aldeko apustua indartzeko, elikagaien banaketa-sektorea eraldatzeko funtsezko palanka gisa. Aliantzak konponbide aurreratuak garatzea ahalbidetuko du, eraginkortasun operatiboa, segurtasuna eta kontsumitzaileen esperientzia hobetzeko, eta, aldi berean, gaikuntza teknologikoa eta enpresa-aukera berriak sortzea bultzatuko du.

 

Datozen lau urteetan, bi erakundeek batera lan egingo dute adimen artifiziala, datuen analitika aurreratua, zibersegurtasuna edo hiperautomatizazioa bezalako eremuetan oinarritutako I+G proiektuetan. Retail sektorea birdefinitzeko eta EROSKIren lehiakortasuna indartzeko potentzial handia duten teknologiak, gero eta ingurune digitalizatuago batean.

 

Hitzarmenak talde mistoak eta lankidetza-gune partekatuak sortzea aurreikusten du, bi erakundeetako profesionalen artean ezagutza transferitzea erraztuz. Halaber, talentu teknologikoa erakartzeko, garatzeko eta espezializatzeko ekimenak biltzen ditu, berrikuntza-proiektuetan, prestakuntza-programetan eta trebakuntza-jardueretan batera parte hartuz. MONDRAGONen berrikuntza-ekosistema indartzen duten oinarri teknologikoko enpresa-ekimen kooperatibo berriak abian jartzeko atea ere irekitzen du lankidetzak.

 

Enpresaren esparruan, Enrique Monzonis, EROSKIko berrikuntza eta teknologiaren zuzendariak nabarmendu duenez, “berrikuntza zeharkako gaitasuna da, eta negozioa eta teknologia lotzen ditu benetako balioa sortzeko. Aukera ematen digu erabaki hobeak hartzeko, modu eraginkorragoan jarduteko eta gure bezeroei esperientzia esanguratsuagoak eskaintzeko. Testuinguru horretan, IKERLANekiko lankidetzak indartu egiten du teknologiak benetako eragina izan dezan egiten dugun apustua, retailaren etorkizuna definitzen ari diren funtsezko eremuetan batera lan eginez”.

 

Bestalde, Ion Etxeberria IKERLANeko zuzendari nagusiak nabarmendu duenez, “aliantza honek retail sektorean benetako eragina duten soluzio teknologikoak bultzatzea ahalbidetzen digun lankidetza indartzen du. Proiektu zehatzetatik haratago, talentua garatzen eta aukera berriak sortzen lan egingo dugu, epe luzerako ikuspegiarekin”.

 

Berrikuntza aplikatua

 

Akordioak bi erakundeen arteko ibilbide luzeko lankidetza estrategikoa indartzen du, eta dagoeneko EROSKIn arrakastaz ezarritako soluzio teknologikoak ekarri ditu.

 

Lankidetza horren ondorioz, bi erakundeek prozesuen automatizazio robotikoa (RPA) eta adimen artifiziala konbinatzen dituzten soluzio garatu dituzte, administrazio-dokumentazioaren bolumen handiak kudeatzera bideratuta. Soluzio horiek aukera ematen dute analisia automatizatzeko, informazioa ateratzeko eta sistema korporatiboetan integratzeko, eraginkortasun- eta doitasun-maila handiak lortuz.

 

Gainera, EROSKIk eta IKERLANek elkarrekin parte hartzen dute GALAXIA proiektuan, HAZITEKek finantzatu eta Lantek buru duena. Proiektu horren helburua da enpresa-prozesuetan modu autonomoan jarduteko gai diren eragile anitzeko sistemetan oinarritutako adimen artifizialeko arkitekturak garatzea. Testuinguru horretan, EROSKI retail eremuan soluzioak bultzatu eta balidatzen dituen enpresa da, eta IKERLAN, berriz, garapen teknologikoaren buru.

 

Halaber, bi erakundeek ikusmen artifizialeko esperientzia pilotu bat garatu dute linealak optimizatzeko, denbora errealean produktu falta detektatzeko eta birjarpen-prozesuak hobetzeko gai dena, betiere bezeroen pribatutasuna ahalik eta gehien errespetatzea bermatzen duen ikuspegi batetik.

 

Gaur egun, EROSKIk eta IKERLANek AurreraGo proiektuaren trakzio-taldean parte hartzen dute. Ekimen horrek MONDRAGONek adimen artifizialaren eta teknologiaren alde egiten duen apustua artikulatzen du, eta unibertsitateak, zentro teknologikoak, industria-kooperatibak, finantza-erakundeak eta zerbitzu-erakundeak biltzen ditu, besteak beste.

 

Balio kooperatiboetan oinarritutako berrikuntza

 

EROSKIk eta IKERLANek ibilbide sendoa dute MONDRAGONen barruan, berrikuntza, ezagutzaren sorrera eta ingurunearen garapen ekonomiko eta sozialarekiko konpromisoa batzen dituen ikuspegi komun batean oinarrituta.

 

Aliantza horrekin, bi erakundeek beste urrats bat eman dute lankidetzan, etorkizuneko erronka teknologikoei aurre egiteko eta enpresen lehiakortasunean eta pertsonen esperientzian benetako eragina duten soluzioak garatzeko gaitasuna sendotuz.

 

EROSKIri buruz

 

EROSKI Espainiako merkatuaren iparraldeko banaketa-talde liderretako bat da — Galiziatik Balearretara —, eta % 12,32ko merkatu-kuota du eremu horretan; liderra da Euskal Autonomia Erkidegoan, Nafarroan eta Galizian, eta koliderra da Balearretan. Bere omnikanal sare komertziala, 2025aren itxieran, 1.508 saltokira igotzen da, supermerkatu, hipermerkatu, cash & carry eta online supermerkatuen artean, gasolindegiez, kirol dendez eta elikadurakoak ez diren beste negozio batzuez gain. Era berean, 6 milioi bazkide bezero baino gehiago ditu, eta 28.000 pertsonak baino gehiagok osatzen dute bere plantilla; horietatik 8.300 baino gehiago bazkide jabeak dira.

 

IKERLANi buruz

 

IKERLAN zentro liderra da teknologia transferitzen eta industriari eta enpresei oro har balio lehiakorra ematen. Soluzio integralak eskaintzen ditu, hiru arlo handitan hainbat domeinu teknologiko konbinatuz: teknologia digitalak eta adimen artifiziala, sistema elektroniko txertatuak eta zibersegurtasuna, eta teknologia mekatronikoak eta energiaren arlokoak. Gaur egun, 400 lagunek baino gehiagok osatzen dute taldea, eta Arrasaten, Donostialdean eta Bilbon ditu egoitzak. MONDRAGON Korporazioko eta Basque Research and Technology Alliance (BRTA) kooperatibako kide den aldetik, IKERLAN enpresa-eredu iraunkorra, lehiakorra eta etengabe eraldatzen ari dena da.