EROSKI eta Basque Culinary Center bosgarren urtez jarraian bultzatu dute “EROSKI-BCC Onenak Aitortzak”, BCC alumni komunitateko kideen proiektuak babestea helburu dutenak, elikadura eta gastronomia ulertzeko modua eraldatzen ari direnak eta tokiko produktua, jasangarritasuna eta berrikuntza sustatzeko konpromisoagatik nabarmentzen direnak, bi erakundeek partekatzen dituzten balioak. Aurtengo edizioan, Esther Merino aitortu dute, NoLo (alkoholik gabeko) edariak eta hartzidura artisau-teknikak garatzen aitzindaria; Lola Palacio, Iñaki Gómezekin batera, Asturiasko Villaviciosa (Castiello de Selorio) herriko Alenda jatetxearen bultzatzailea; eta Jon Iñaki Yurrebaso, Axpen (Bizkaia) kokatutako Mendi Goikoa Bekoa jatetxe eta hotelaren jabea.

Aitortza hauen banaketa gaur egin da Basque Culinary Center-en, Miramonen (Donostia-San Sebastián), eta bertan izan dira, prestakuntza-zentroaren aldetik, Joxe Mari Aizega, Basque Culinary Centerreko zuzendari nagusia; Vicente Atxa, Basque Culinary Centerreko Patronatuko presidentea eta Mondragon Unibertsitateko errektorea; EROSKIren aldetik, Rosa Carabel, kooperatibako CEOa; Asun Bastida, Taldeko Harreman Instituzional eta Komunikazio Korporatiboko zuzendaria; eta, halaber, Eusko Jaurlaritzako eta Nafarroako Gobernuko ordezkariak, baita Donostiako egungo alkatea, Jon Insausti ere. Gainera, ehun profesional baino gehiagok —elikagai-industriakoak, erakundeetakoak, elkarteetakoak eta komunikabideetakoak— parte hartu dute topaketan, eta bertaratuek esperientzia gastronomiko paregabe batez gozatu ahal izan dute, sarituetako hiru pertsonek prestatutako plater eta edariak dastatuz.

Rosa Carabelek, bere hitzaldian, berrikuntza-tradizio binomioa azpimarratu du: “EROSKIn berritzen dugu gure sustraiak ahaztu gabe, tokiko ekoizleekin elkarlanean, ikuspegi komun bat partekatuz: gure eskualdeetako aberastasun gastronomikoa zaintzea, biodibertsitatea babestea eta gure identitatearen parte diren ohitura tradizionalak bizirik mantentzea. Tradizioa etorkizuna eraikitzeko inspirazio-iturri dela uste dugu eta, horregatik, gaur gure gastronomiaren onena gordetzen dutenak eta, aldi berean, etorkizuna irudikatzera ausartzen direnak aitortzen ditugu.”

 

Bestalde, Joxe Mari Aizegak honako hau azpimarratu du: “Bosgarren urtez jarraian EROSKI-BCC Onenak Aitortzak ematen ditugu, ekimen hau gure ikasle ohiek garatzen ari diren espiritu ekintzailea eta lan bikaina ikusarazteko sortu zen, hala nola tokiko produktua, jasangarritasuna, osasuna eta berrikuntza bezalako arloetan. Aitortza hauen sendotzea gure ikasgeletan formatu den talentu gaztearen adierazlerik onena da. Ekimen hau EROSKIrekin batera garatzeak gastronomiaren eta elikaduraren etorkizuna markatuko duten belaunaldi berriekiko konpromiso partekatua islatzen du.”

2025eko talentu aitortuak

Esther Merino, Basque Culinary Center-en Gastronomia eta Sukaldaritza Arteetan graduatua, NoLo (alkoholik gabeko) edariak eta hartzidura artisau-teknikak garatzen aitzindaria da. Kopenhageko Noma eta Alchemist jatetxeetan prestakuntza-esperientziak izan ondoren, BOWS sortu zuen, metodologia propioa duen aholkularitza gastronomikoa. Basque Culinary Center-en irakasle izan da eta duela gutxi Sagarmut merkaturatu du, Zapiain sagardotegiarekin garatutako vermuta. Bere lana edari industrialen alternatiba osasungarriak sortzera bideratzen da, tokiko eta sasoiko osagaiak erabiliz. Bere jarduerak sektorearen eraldaketa irudikatzen du edari jasangarriagoetara, tradizioa eta berrikuntza uztartuz eta lurraldean balioa sortuz.

Bestalde, Lola Palacio, Basque Culinary Centerreko Jatetxeen Berrikuntza eta Kudeaketa Masterrean formatua, Iñaki Gómezekin batera Alenda jatetxearen jabea da, Asturiasko Villaviciosa (Castiello de Selorio) herrian. Ricardo Sotresekin Pancarreko Retiron sei urteko esperientziaren ondoren, 2023an ireki zuen Alenda, Michelin Gidaren eta Repsol Eguzki baten aintzatespena lortuz, eta Asturiasko erreferente gastronomiko bihurtuz. Bere proposamena jasangarritasun eredu integral batean eta kilometro zero filosofian oinarritzen da: Lastreseko lonjako arrain freskoak eta baratze propioko barazkiak. Arreta pertsonalizatuak eta giro atseginak bezeroak Asturiasko ingurunearekin konektatzen dituzte, gazte ekintzaileek lurraldearekiko eredu jasangarriagoetarako trantsizioa nola gidatzen duten erakutsiz.

Azkenik, Jon Iñaki Yurrebaso Basque Culinary Center-en Zientzia eta Sukaldaritza Arteetan graduatua da eta Axpeko (Bizkaia) Mendi Goikoa Bekoa jatetxe eta hotelaren jabea da. Gastronomiako “100 talentu gazte”en artean dago. Torres anaiekin eta Dani Garcíarekin izandako prestakuntza-esperientzien ondoren, 26 urterekin ekin zion Mendi Goikoa Bekoa 2021ean irekiz, pandemia betean. Bere lana Repsol Eguzki batekin aitortua izan da. Bere proposamena euskal gastronomia kultura berreskuratzean oinarritzen da, tokiko eta sasoiko produktuekin, parrillaren lana nabarmenduz. Lurraldearekiko eta jasangarritasunarekiko konpromisoa gertuko ekoizleen aldeko apustuan islatzen da, eskualdearen garapen ekonomikoari lagunduz.

EROSKI – BCC Onenak aitorpenen edizio desberdinetan zehar, aditu-batzorde baten bidez, Basque Culinary Centreko gradu, master edo programa profesionaletan formatutako profesionalak hautatu dira, eta beren proiektu propioak abian jarri dituzte, berrikuntza, jasangarritasuna eta tokiko produktua ardatz hartuta. Hiru kontzeptu hauek tokiko gastronomiaren eta etorkizuneko elikaduraren oinarria dira, eta bi erakundeek aktiboki sustatzen dituzte abian jartzen dituzten ekimen guztietan.

 

EROSKIri buruz

EROSKI Espainiako iparraldeko merkatuaren banaketa talde liderretako bat da —Galiziatik Balearretara—, eta %12,7ko merkatu-kuota du eremu horretan; Euskal Autonomia Erkidegoan, Nafarroan eta Galizian liderra da, eta Balearretan ko-liderra. Bere sare komertzialak, 2024aren amaieran, 1.502 establezimendu ditu, supermerkatuak, hipermerkatuak, cash & carry eta online supermerkatuak barne; baita gasolindegiak, kirol dendak eta elikagaiak ez diren bestelako negozioak ere. Halaber, 6,4 milioi Bezero Bazkide baino gehiago ditu eta 27.600 pertsona baino gehiagok osatzen dute bere plantilla, horietatik 9.000 inguru jabe bazkideak direlarik.

 

Basque Culinary Centerri buruz

Basque Culinary Centerrek ekosistema bakar bat osatzen du, non prestakuntza, berrikuntza, ikerketa eta ekintzailetza elkarrekin bizi diren gastronomia garatzeko eta bultzatzeko, gastronomia jaten dugunari eta nola egiten dugunari buruzko ezagutza arrazoitutzat ulertuta. Bere misioa balio hauetan oinarritzen da: pasioa, berrikuntza, bikaintasunarekiko orientazioa eta gizarte-konpromisoa.

2011tik Donostia-San Sebastiánen kokatua, erakunde aitzindariak Gastronomia 360º ikuspegia garatu du eragin handiko hainbat ekimenen bidez. Gaur egun, Basque Culinary Center nazioarteko proiekzio handiko proiektu bihurtu da, Gastronomia Zientzien Fakultateak osatua (non gastronomiako gradua eta 13 master eskaintzen diren), GOe-Gastronomy Open Ecosystem-ekin (non talentua, ezagutza eta berrikuntza uztartzen diren elikadura zaporetsu, osasungarri eta jasangarria sustatzeko etorkizun goxoa sortzen laguntzeko), eta EDA Drinks & Wine Campus-ekin, zeinak ardoaren eta edarien sektorea indartzea helburu duen prestakuntza, ikerketa, berrikuntza eta ekintzailetzaren bidez.