As microalgas presentan un gran potencial como fonte renovable de proteínas, aceites, amidón e outros compostos de interese para as industrias alimentaria e de materiais. Porén, a súa incorporación aos produtos de consumo continúa estando limitada por factores como os custos de produción, as propiedades organolépticas dalgúns ingredientes, a súa funcionalidade ou a necesidade de procesos de extracción e purificación eficientes e escalables.

O proxecto europeo CleanAlgae2Value pretende superar estas barreiras mediante o desenvolvemento dun proceso innovador e competitivo para producir, fraccionar e valorizar microalgas brancas utilizando CO₂ como fonte de carbono, de forma que se obteñen ingredientes de calidade alimentaria e unha baixa pegada de carbono, como proteínas, aceites, pigmentos naturais e fraccións ricas en amidón, para o seu uso tanto en alimentos como en novos materiais de envasado.

Para iso, desenvolverase e demostrarase o Micro-Algae Biorefinery Upgrade Module (MABUM), un módulo replicable que mellorará o rendemento das biorrefinerías mediante procesos de extracción, fraccionamento e purificación máis eficientes. Estes procesos optimizaranse primeiro a escala piloto e despois demostraranse a maior escala, avaliando ademais a súa viabilidade técnica e económica, a seguridade dos ingredientes e a sustentabilidade ambiental e social.

Os ingredientes obtidos validaranse en 15 prototipos, 13 para aplicacións alimentarias e 2 para solucións de bioenvasado. Entre as aplicacións previstas inclúense alternativas aos produtos lácteos e cárnicos, así como películas e bandexas alimentarias elaboradas con compoñentes derivados das microalgas.

CleanAlgae2Value está coordinado por SOLMEYEA e reúne actualmente a 15 socios de 9 países europeos, entre centros de investigación, provedores tecnolóxicos e empresas de diferentes sectores da cadea de valor. O proxecto comezou en outubro de 2025 e terá unha duración de 48 meses, ata setembro de 2029..

EROSKI contribuirá a avaliar a aceptación de novos alimentos e envases desenvolvidos a partir de microalgas, con especial atención aos produtos alternativos aos lácteos, á carne e ao peixe, analizando xunto cos consumidores aspectos como o sabor, a textura, a funcionalidade do envase e a percepción da sustentabilidade.

 

Para máis información: https://cleanalgae2value.eu/