O proxecto BIOLABEL ten como obxectivo desenvolver e validar novas solucións de etiquetaxe compostable para froitas, hortalizas e plantas de cultivo, axudando a reducir o uso de plásticos convencionais e a mellorar a xestión dos residuos orgánicos.

Na actualidade, moitas das etiquetas que se empregan nestes produtos conteñen materiais, adhesivos e tintas que fan que sexan difíciles de procesar ao final da súa vida útil. Para abordar este desafío, BIOLABEL está a traballar no deseño ecolóxico de etiquetas fabricadas a partir de materiais de orixe renovable, que manteñan as propiedades necesarias para o seu uso en condicións reais de comercialización e sexan compatibles cos procesos de compostaxe industrial.

O proxecto aborda o desenvolvemento destas solucións desde unha perspectiva integral, tendo en conta non só os materiais e os procesos de fabricación, senón tamén o seu comportamento durante o transporte, o almacenamento e a comercialización, así como o seu impacto ambiental ao final da súa vida útil. Para iso, realizaranse probas de funcionalidade e compostabilidade, xunto cunha análise do ciclo de vida que permitirá comparar as novas solucións coas etiquetas convencionais.

EROSKI participa no proxecto achegando a súa experiencia no sector da distribución, contribuíndo á definición dos requisitos que deben cumprir as novas etiquetas e á validación destas en condicións reais de comercialización. Tamén participará na avaliación da súa aceptación por parte das persoas consumidoras, analizando como comunicar as súas características ambientais de xeito claro e comprensible.

BIOLABEL está liderado por BIOLID, unha empresa especializada no desenvolvemento e fabricación de etiquetas, e conta coa participación de EROSKI e GARAIA, así como coa colaboración do centro tecnolóxico GAIKER. O proxecto desenvolverase de abril de 2026 a decembro de 2027.

A través desta iniciativa, EROSKI reforza o seu compromiso coa innovación e a economía circular, promovendo solucións de etiquetaxe máis sostibles que axuden a reducir a presenza de materiais non compostables nos residuos orgánicos e faciliten a transición cara a modelos de consumo e distribución cun menor impacto ambiental.