A Fundación EROSKI celebra este curso escolar 2026-2027 o 15.º aniversario do seu Programa educativo sobre alimentación e hábitos saudables (PEAHS), unha iniciativa que ten como obxectivo fomentar unha alimentación equilibrada e uns hábitos de vida saudables e sostibles entre os escolares. Desde o seu lanzamento en 2012, máis de 2,5 millóns de escolares participaron no programa, que desenvolveu máis de 9.000 obradoiros nas tendas e se consolidou como unha das principais iniciativas educativas da Fundación para fomentar estilos de vida saudables desde a infancia.

Ao longo dos seus quince anos de traxectoria, o programa mantivo unha elevada participación da comunidade educativa. Cada curso chega a máis de 2.500 colexios de toda España, case o 20 % dos centros de primaria, e rexistra unha taxa de repetición superior ao 70 %. No curso 2025-2026 participaron 254.461 alumnos e alumnas de 2.736 centros educativos, fronte aos 233.863 escolares e 2.433 colexios do curso anterior. A evolución dos últimos anos tamén reflicte o crecemento sostido da iniciativa: desde o curso 2021-2022, a participación pasou de 159.442 a 254.461 escolares e de 1.853 a 2.736 centros educativos.

A iniciativa conta cunha gran presenza na rexión norte, onde participaron o curso pasado 171.353 estudantes de 1.895 colexios de Galicia, Asturias, Cantabria, o País Vasco, Navarra, A Rioxa, Aragón, Cataluña e as Illas Baleares. Estas cifras representan o 16 % do alumnado e o 32 % dos centros de primaria destas comunidades autónomas.

«Celebrar quince anos deste programa e chegar a máis de 2,5 millóns de escolares confirma o valor da educación como ferramenta para favorecer estilos de vida saudables desde idades temperás. Máis alá das cifras, satisfainos especialmente a confianza que os centros educativos depositan cada ano nesta iniciativa e a súa capacidade para seguir chegando ás novas xeracións. Queremos seguir a apoiar os escolares, as familias e a comunidade educativa, ofrecéndolles coñecementos e ferramentas que os axuden a tomar decisións máis saudables e responsables na súa vida diaria», afirmou Alejandro Martínez Berriochoa, director xeral da Fundación EROSKI e director de Saúde e Sustentabilidade de EROSKI.

Aprender tamén desde a experiencia

O programa PEAHS combina contidos e recursos didácticos con experiencias prácticas que permiten trasladar o que se aprendeu a situacións cotiás. O programa está deseñado de forma modular para adaptarse ás necesidades dos docentes e dos centros educativos e inclúe actividades na aula, obradoiros nas tendas e propostas para traballar en familia.

O programa forma parte da Escola de alimentación da Fundación EROSKI, un espazo dirixido a escolares, familias, profesionais da educación e da saúde, e cidadanía en xeral que impulsa iniciativas de información e formación relacionadas coa nutrición e os estilos de vida. A súa actividade articúlase arredor da formación na escola, en familia e para calquera idade.

Os seus materiais desenvolvéronos profesionais especializados e, ao longo da súa traxectoria, a iniciativa contou coa colaboración de organizacións como a Fundación Española do Corazón, UNICEF, WWF e o Basque Culinary Center. Ademais, a Escola de alimentación conta co asesoramento dun comité científico que achega unha visión externa, experta e independente.

Un dos seus elementos diferenciais son os obradoiros presenciais nas tendas, deseñados para achegar de forma práctica ao alumnado os contidos que se traballaron. Desde o inicio do programa, celebráronse 9.195 obradoiros, nos que participaron 213.346 escolares. Actualmente, a Fundación EROSKI ofrece 14 modalidades diferentes de obradoiros presenciais dirixidos ao alumnado de primaria.

Coñecer os hábitos da infancia para seguir avanzando

O labor educativo compleméntase cunha liña de investigación orientada a coñecer mellor os hábitos e as realidades dos nenos e nenas e a xerar información que contribúa a orientar as futuras actuacións de sensibilización e educación.

En 2024, a Fundación EROSKI realizou a súa primeira enquisa a 2.126 estudantes de primaria de 8 a 12 anos que pertencían a nove comunidades autónomas do norte de España. O estudo abordou tres ámbitos: os hábitos familiares relacionados coa compra, a cociña e as comidas; os principais referentes dos menores en materia de alimentación; e a relación entre a comida e as emocións.

Esta liña tivo continuidade en 2025 cunha segunda investigación entre 2.581 escolares de 8 a 12 anos, centrada no impacto das pantallas nos seus hábitos de vida e en aspectos relacionados coas pautas de uso, as normas e os límites familiares e a percepción dos riscos asociados á sobreexposición aos dispositivos dixitais.

Coincidindo co seu 15.º aniversario, a Fundación EROSKI poñerá en marcha a terceira edición desta enquisa, continuando unha liña de traballo que permite afondar no coñecemento da poboación infantil e xerar información de valor para seguir avanzando na promoción do seu benestar.

 

Unha traxectoria recoñecida

O traballo que desenvolveu a Fundación EROSKI en educación alimentaria, promoción de hábitos saudables e sensibilización recibiu ao longo destes anos diversos galardóns. Entre eles, está o Premio Estratexia NAOS, o recoñecemento da Academia Española de Nutrición á Mellor Iniciativa Empresarial e o Selo GOSASUN ao PEAHS pola súa contribución ao fomento de prácticas saudables, ademais doutros recoñecementos nos ámbitos da comunicación e a responsabilidade social.