A categoría de produtos sen glute continúa a consolidarse na cesta da compra de moitos fogares, impulsada por unha maior concienciación sobre a alimentación e a necesidade de ofrecer alternativas específicas para as persoas que deben seguir unha dieta sen glute. Neste contexto, os datos recentes de EROSKI amosan que o aforro e a confianza se converteron en dous factores determinantes para as persoas que incorporan este tipo de produtos á súa alimentación.

Aínda que os produtos específicos sen glute representan unha pequena parte do gasto total en alimentación, están presentes no 8 % dos fogares que compran en EROSKI e representan aproximadamente o 1 % do seu gasto total en alimentación.

Ademais, trátase dun perfil de compra cun alto nivel de fidelidade. Os fogares que compran este tipo de produtos duplican o gasto anual medio, realizan unha frecuencia de compra un 70 % superior e gastan un 15 % máis en cada visita respecto ao conxunto da clientela da cooperativa.

O perfil predominante corresponde ás familias con fillos, onde a penetración acada ata o 12 %, mentres que nos fogares sénior o consumo está por debaixo da media.

Os datos tamén reflicten que o consumo se concentra nun núcleo de compradores moi definido: aproximadamente o 20 % dos fogares que adquiren produtos sen glute xera preto do 80 % das vendas da categoría. Nestes fogares, este tipo de produtos xa representa arredor do 3 % de toda a súa cesta da compra.

 

O aforro, un factor cada vez máis determinante

Para as persoas que deben seguir unha dieta estrita sen glute, o prezo segue a ser un dos principais condicionantes de compra. Neste sentido, a marca propia consolidouse como unha panca para facilitar o acceso a esta categoría.

Na actualidade, o 65 % dos fogares que compran produtos sen glute adquire referencias de marca propia EROSKI, e case a metade faino de forma exclusiva.

Na gama específica de produtos sen glute, a marca propia EROSKI ofrece unha diferenza de prezo de entre un 25 % e un 30 % respecto ás principais marcas especializadas, o que contribúe a reducir o custo adicional que tradicionalmente representou esta categoría para moitas familias.

Un compromiso por facer que a categoría sexa máis accesible

EROSKI ofrece actualmente 656 referencias de marca propia aptas para persoas que seguen unha dieta sen glute, das que 32 pertencen á súa gama específica «Sen glute», e 624 referencias das súas marcas propias incorporan o pictograma «Sen glute», que garante a súa idoneidade para as persoas que deben seguir este tipo de alimentación.

Esta oferta é o resultado dunha aposta sostida por desenvolver unha oferta cada vez máis ampla e adaptada ás necesidades das persoas que deben seguir unha dieta sen glute. Durante os últimos anos, a cooperativa reforzou progresivamente esta categoría ampliando a gama, mellorando a súa dispoñibilidade e desenvolvendo novas referencias que permiten responder ás necesidades das persoas celíacas sen renunciar á calidade nin aumentar innecesariamente o custo da cesta.

«Para as persoas que deben seguir unha dieta sen glute, a alimentación non é unha elección, senón unha necesidade. O noso compromiso é ofrecer unha gama cada vez máis ampla de produtos que combinen calidade, seguridade alimentaria e un prezo competitivo, para que todo o mundo poida realizar a súa compra con confianza, liberdade de elección e sen que o custo supoña unha barreira adicional. A nosa oferta combina unha gama específica de produtos sen glute con centos de referencias das nosas marcas propias identificadas co pictograma «Sen glute», o que nos permite ofrecer solucións para practicamente calquera momento de consumo», afirma Beatriz Santos, directora comercial de EROSKI.

O desenvolvemento dunha gama específica sen glute tamén implica un importante esforzo en materia de selección de ingredientes, control de procesos, rastrexabilidade e seguridade alimentaria para garantir que os produtos cumpran os estándares que exixe este colectivo.

 

Un compromiso que vai máis alá da gama

O compromiso de EROSKI compleméntase cunha estreita colaboración con asociacións de persoas con enfermidade celíaca. Durante o ano 2025, a cooperativa renovou os seus convenios coas asociacións do País Vasco, A Rioxa, Cataluña, Navarra e as Illas Baleares, e asinou novos acordos coas de Galicia, Asturias e Castela e León.

Grazas a estes convenios, 2.817 persoas asociadas puideron beneficiarse, entre outras vantaxes, dun 20 % de desconto na compra de máis de 300 referencias específicas sen glute, unha iniciativa coa que EROSKI busca contribuír a reducir o esforzo económico de seguir unha dieta sen glute.

Para EROSKI, o desenvolvemento desta categoría reflicte un compromiso sostido cunha alimentación inclusiva e accesible. Ampliar a gama, ofrecer alternativas de calidade, colaborar coas asociacións de persoas con enfermidade celíaca e contribuír a reducir o esforzo económico que supón seguir unha dieta sen glute forman parte do seu propósito de facilitar unha alimentación segura e adaptada ás necesidades de todas as persoas consumidoras.