Elorrio, 6 de novembro de 2025.- EROSKI colabora un ano máis coa Gran Recollida, a iniciativa solidaria impulsada pola Federación Española de Bancos de Alimentos (FESBAL) e os seus 54 bancos asociados, que se levará a cabo do 7 ao 9 de novembro nos hipermercados, supermercados e franquías da rede comercial do Grupo EROSKI. A campaña, que combina a doazón económica e a recollida física de produtos, ten como obxectivo reunir alimentos de primeira necesidade para as familias en situación de vulnerabilidade.

Durante os días da campaña, a clientela poderá colaborar doando o importe que desexe ao pasar pola caixa, unha achega que quedará reflectida no ticket de compra e que poderá ser desgravable na súa declaración da renda.

As doazóns a través da caixa convértense nun saldo directo para os Bancos de Alimentos, que o trocarán integramente por produtos de alimentación da cesta básica segundo as necesidades das persoas ás que atenden ao longo do ano.

Ademais, en determinados centros haberá recollida física de alimentos os días 7 e 8 de novembro, coa colaboración de voluntarios dos Bancos de Alimentos e do persoal das tendas EROSKI. Unha vez finalizada a campaña, a cooperativa encargarase da recollida, loxística e cuantificación centralizada das doazóns, que posteriormente serán transformadas por FESBAL en alimentos básicos e distribuídas entre as familias que máis o necesitan.

“Un ano máis, apelamos á solidariedade da nosa clientela para apoiar aos colectivos máis vulnerables. Desde EROSKI queremos acompañar a inestimable labor que realizan os Bancos de Alimentos, sumando unha achega adicional sobre o total das doazóns realizadas. A Gran Recollida é unha cita que pon de manifesto a forza da cooperación e o compromiso compartido para construír unha sociedade máis xusta e solidaria”, explicou Alejandro Martínez Berriochoa, director de Saúde e Sustentabilidade de EROSKI.

Pola súa banda, Pedro Llorca, presidente da FESBAL, asegurou que “desde a Federación Española de Bancos de Alimentos e os 54 bancos asociados, agradecemos profundamente a implicación de EROSKI e da súa clientela nunha iniciativa tan necesaria como a Gran Recollida. O noso obxectivo é seguir ofrecendo, no momento preciso, os alimentos máis necesarios ás familias que máis os precisan. Este tipo de alianzas son esenciais para soster o noso labor e manter viva a cadea de solidariedade que une a toda a sociedade”.

Ademais das doazóns aos Bancos de Alimentos, EROSKI leva a cabo outras iniciativas en liña co seu compromiso coa solidariedade e a sustentabilidade, entre as que destacan os programas ‘Desperdicio Cero’ e ‘Céntimos Solidarios’, campañas puntuais de cooperación internacional, outras iniciativas como a colaboración con Too Good To Go, as campañas de froitas feas e a valorización de subprodutos orgánicos. No primeiro semestre de 2025, estas accións permitiron evitar o desperdicio de 10.750 toneladas de alimentos.

29 anos de colaboración cos Bancos de Alimentos

A colaboración de EROSKI cos Bancos de Alimentos remóntase a 1996, a proposta do Banco de Alimentos de Bizkaia e dos propios consumidores que demandaban á cooperativa iniciativas solidarias dirixidas a colectivos desfavorecidos e persoas en risco de exclusión social. Así, naceron ese mesmo ano as campañas de recollida de alimentos nas tendas da cooperativa.

Posteriormente, EROSKI iniciou o seu programa de doazón de alimentos envasados próximos á súa data de consumo preferente, pero aínda aptos para o consumo con total seguridade alimentaria, grazas ao cal doa máis de 5.000 toneladas de alimentos cada ano.

EROSKI foi recoñecida co “Premio Espiga de Ouro”, o máximo galardón que outorga a Federación Española de Bancos de Alimentos a aquelas organizacións que destacan pola súa colaboración na redistribución solidaria dos excedentes alimentarios.